ጎረባብቲ

ምስ ጎረባብቲ ዘለኩም ጽቡቕ ርክብ ንህይወት ንኹሉ ሰብ ዝያዳ ባህ ዘብል ይገብሮ። ጽቡቕ ዝምድናታት ንምፍጣር፣ ናብ ሓድሽ ኣፓርታማ ወይ ገዛ ክትግዕዙ ከለኹም ምስ ጎረባብትኹም ክትላለዩ ይምከር።

ኣብ ብዙሓት ከባቢታት፣ ጎረባብቲ በብግዜኡ ብሓባር ክእከቡ ልሙድ እዩ፣ ንኣብነት፣ ኣብ ናይ ጎረባብቲ ድግስ ወይ ኣብ ባርበኪዩ። ነፍሲ ወከፍ ሰብ ምስ ጎረባብቱ ዝያዳ ስሩዕ ርክብን ምሕዝነትን ክህልዎ ወይ ከይህልዎ ናጻ እዩ። ብኻልእ መንገዲ'ውን ምስ ሰባት ክትራኸቡ ትኽእሉ ኢኹም፣ ኣብ ከባቢኹም ኣብ ዝርከባ ማሕበራትን ክለባትን (ስፖርት፣ ደርፊ ወይ ልእ) ኣብ ዝገብርኦ ንጥፈታት ብምስታፍ።

ብሓፈሻ፣ ኣብ ብዙሓት ኣሃዱታት ዘለዎም ኣፓርታማታት ሕግታት ገዛ ኣለዉ። መብዛሕትኡ ግዜ፣ እዞም ሕግታት ምስ ውዕል ክራይ ይካተቱ እዮም። እዚ ሰነድ'ዚ ብስኒት ብሓባር ንምንባር ዝሕግዙ ሕግታት የቐምጥ። ንኣብነት፣ ከመይ ጌርኩም ናይ ምሕጻብ ክፍሊን ናይ ሓባር ቦታታትን ክትጥቀሙ ከም እትኽእሉ።

ነቲ ናይ ገዛ ሕግታት ምኽባር ኣገዳሲ እዩ። ብፍላይ ድማ ናይ ጸጥታን ዕረፍትን ግዜ ኣኽብሩ። ሕጊ እዩ።

ድግስ ወይ ፍጻመ ክትገብሩ እንተደሊኹም፣ ንጎረባብትኹም ምሕባር ኣገዳሲ እዩ። ኣብ ወረቐት ጽሑፍ ጽሒፍኩም ኣብ ኣፍደገ እቲ ህንጻ ከተቐምጡ ትኽእሉ ኢኹም። ገለ ጫውጫውታ ክህሉ ከም ዝኽእል ኣፍሊጡ። ሰባት ሓበሬታ ምርካብ ደስ የብሎም እዩ።

ሓደ ጎረቤት ሕጊ ገዛ እንተዘይኣኽቢሩ ጸገም ክኸውን ይኽእል እዩ። ኣብ መንጎ ጎረባብቲ ዘይምርድዳእ እንተተፈጢሩ፣ መጀመርታ ብህድኣትን ብኣኽብሮትን ምዝራብ ይምከር። እቲ ኩነታት እንተዘይተመሓዪሹ፣ ምስቲ ወናኒ ግዛ ወይ ምስቲ ትካል ክትራኸቡ ትኽእሉ ኢኹም።

ከምኡ'ውን መንጎኛ ክትሓቱ ትኽእሉ ኢኹም። መንጎኛ ማለት ንሰባት ብሓባር ክረዳድኡን ፍታሕ ክረኽቡን ዝሰምዕን ዝሕግዝን ገለልተኛ ሰብ እዩ።

እቲ ኩነታት ከቢድ እንተኾይኑ ወይ ሓደ ሰብ ኣብ ሓደጋ እንተሃልዩ (ንኣብነት። ምፍርራሕ ወይ ዓመጽ)፣ ናብ ፖሊስ ክትድውሉ ትኽእሉ።

ኣብ ስዊዘርላንድ ናይ ህጹጽ ረድኤት ቁጽሪ 117 እዩ።