እቲ ኮሙን ናይ ጎሓፍ ምእካብ ሓላፍነት ኣለዎ። ነፍሲ ወከፍ ኮሙን ናይ ገዛእ ርእሳ ሕግታት ኣለዋ። ምፍላይ ጎሓፍ ኣገዳሲ እዩ፣ በዚ ምኽንያት ድማ እዩ ንዕኡ ዝኸውን መእከቢ ቦታታት ዘሎ።
ነቲ ጎሓፍ ምፍላይ፣ ንከባቢ ንምዕቃብን ገንዘብ ንምቑጣብን ይሕግዝ። ዳግማይ ክጥቀሙሉ ዝኽእሉን ሓደገኛታትን ጎሓፍ (ወረቐት፣ ባትሪ፣ ብርጭቆ፣ ካርቶን፣ ተኽሊ ንብረት፣ ኣሉሚንየም፣ ብረት፣ ዓለባ፣ ኣብ ጥቕሚ ዝወዓለ ዘይቲ ወዘተ) ዝተመደቡ መእከቢ ቦታታት ኣለዉ። እዚ ጎሓፍ ኣብ ከረጺት ጎሓፍ ክቕመጥ የብሉን።
ናይ PET ጥርሙዛትን ካልእ መዐሸጊታትን ብነጻ ናብ ድኳናት መግቢ ክምለሱ ይኽእሉ።
ነፍስወከፍ ኮሙን ዝተፈላለዩ ዓይነት ጎሓፍ ንምእካብ መዓልታትን ቦታታትን ዝሓዘ ናይ ምእካብ መደብ ወይ ትልሚ ኣለዎ። እዚ ሰነድ'ዚ መብዛሕትኡ ግዜ ኣብቲ ሓድሽ ኮሙን ክትምዝገቡ ከለኹም ዝወሃበኩም እዩ።
ጎሓፍ ምንዳድ ወይ ኣብ ተፈጥሮ ይኹን ኣብ ጎደና ምግዳፍ ብጥብቂ ዝተኸልከለ እዩ።
ዳግማይ ክጥቀሙሉ ዘይክእሉ ጎሓፍ (ጎሓፍ ገዛ፣ ቁርጽራጽ መግቢ፣ ቅብኣት ዘለዎ ወረቐት) ኣብ ወግዓዊ ከረጺት ጎሓፍ ወይ ከረጺት ምስ ስቲከር ጎሓፍ ክቕመጥ ኣለዎ።
እቲ ናይ ቆሻሻ መወሸቢ ክፍሊት ኣብ ዋጋ ናይቲ ወግዓዊ ከረጺት ወይ ተለጣፊ ይካተት። ነፍስወከፍ ኮሙን ናይ ገዛእ ርእሳ ፍሉይ ከረጺታት ወይ ተለጣፊታት ኣለዋ። ኣብ ናይ ከባቢኹም ድኳናትን ማእከላት ንግድን ኣብ ኣዳራሽ ከተማን ክትዕድጉ ትኽእሉ ኢኹም።
ናይ ጎሓፍኩም ከረጺት ኣብ መንገዲ (ወይ ኣብ መእከቢ ቦታ) ኣብታ ኣብ ዓውደ ኣዋርሕ ዝተጠቕሰት መዓልቲ ምእካብ ጥራይ ኢኹም ክትገድፉ እትኽእሉ። ወይ ድማ ኣብቲ ቦታ ኣብ ዝተጠቐሰ ግዜ ኣብ ሞሎክ (ኣብ ትሕቲ መሬት ዝቕመጥ ሲሊንደራዊ መዐሸጊ) ከተእትይዎም ትኽእሉ ኢኹም።
ካብዚ መዓልታትን ግዜን ወጻኢ ከረጺት ምግዳፍ ክልኩል እዩ።
ነቲ ናይ ምእካብ መደብ ከተኽብሩ ኣለኩም።
ኣብ ገሊኡ ህንጻታት ናይ ነበርቲ ጎሓፍ መዐሸጊ ኣሎ።
ገሊኡ ጎሓፍ መርዛም ወይ ከኣ ንከባቢ ዘርክስ እዩ። ንኣብነት፣ ቀለም፣ ኬሚካላት፣ ባትሪታት፣ ኤሌክትሮኒካዊ ፍርያት፣ ጸዓት ዝቑጥቡ ላምባታትን ኣምፑላትን (LED)፣ ከምኡ’ውን ግዜኦም ዝሓለፉ መድሃኒታት።
እዚ ጎሓፍ ኣብ ከረጺት ጎሓፍ ክቕመጥ የብሉን።
ናብቲ ዝገዛእኹምሉ ድኳን፣ ወይ ናብ ፋርማሲ (ንመድሃኒታት) ክትመልሱ ኣለኩም። እዚ ብነጻ እዩ። ድኳናት ዳግማይ ክወስድዎም ይግደዱ።
ሓደገኛ ጎሓፍ ናብቲ ኣብ Delémont፣ Porrentruyን Saignelégierን ዝርከባ ዞባዊ ማእከላት ምእካብ ሓደገኛ ጎሓፍ ገዛውቲ እውን ክትመልሱ ትኽእሉ ኢኹም።
